ආයෙමත් ආදරෙන් - 2 වැනි කොටස

පලමු කොටස කියවන්න

   මගේ කතාවට නැන්දගේ හිනාව නැවතුනේ බොහෝ වෙලාවකට පස්සෙයි. මටනම් හිනා යනවා තියා නිකං ඉන්නත් බැරි තරමට තරහ ගිහින් තිබුණේ අල්ලපු ගෙදර පොඩි වැඳිරිගේ වැඩවලට.

“අනේ නෑ චුටී පුතේ..ඒ දරුවා ටිකක් දඟ වුනාට හරි හොඳයි..ඒක ඒ දරුවගේ හැටි..අන්කල් ඉන්න කාලේ හරි ආදරෙයි අංකල්ට..දැන් ඔය දරුව ඉන්න නිසා වෙන්න ඇති මේ පැත්තට වැඩිය එන්නේ නැත්තේ. නැත්නම් මෙහේම තමයි.ඒත් ලොකු දරුවානම් කොහොමත් වැඩිය නෑ..පාඩුවේ ඉන්නවා“

නැන්දා කියපු කතාවට හිතනම් ටිකක් නිවුනා. එහෙම්ම කාමරේට ගිහිල්ලා ඇඳුම් පිටින්ම ඇඳට වැටුනා. අක්කා පොඩි එකාව සෝදනවද කොහෙද පොඩි එකා හොඳටම කෑ ගහලා අඬනවා. සිතුවිල්ලකිනි තොරව ටික වෙලාවක් එහෙම්ම ගතවුනා.

ආයෙමත් ආදරෙන් - පලමු කොටස

“ආ...මඩිහ හෝල්ට් එකේ බහින කට්ටිය ඉස්සරහට එන්න..මඩිහ බහින කට්ටිය ඉස්සරහට එන්න“

සුපුරුදු කෑගහන මේ සද්දේ නුපුරුදු විදියට ඇහෙනකොට ගැස්සිලා ඇහැරුනේ පුරුදු විදියටම තමයි. මාතර ටවුන් එකේ ඉඳන් මඩිහට ඕනමනම් කිලෝමීටර පහක් ඇති. වැලිගම බස් එකට ඒ දුර යන්න විනාඩි විස්සක් විතර ගියාට ගාල්ල බස් එකක් නම් විනාඩි දහයෙන් එනවා. මේ කිලෝමීරට පහටත් නින්ද යනවා මොන මගුලක්ද මන්දා. යන්තම් ඇස් දෙක ඇරගෙන නැගිටිනකොට එකට බස් එකට නැගලා එක සීට් එකේ ආපු අතිජාත පාපතර මිත්‍රයා අදත් මාව චාටර් කරන්න මඩිහ හෝල්ට් එක පෙනි පෙනී සද්ද නැතුව ඉන්නවා. අසමජ්ජාති යාළුවෝ. අපොයි මුනුත් එක්ක ඉන්න අපිත් පින් කරලා තියනවනේ.

“ අවලමා තෝ මොකද මාව ඇහැරෙව්වේ නැත්තේ...යකෝ තව ඩිංගෙන් අදත් එදා වගේ යන්න වෙනවා මට තල් අරඹටම“

මම කෑගැහුවේ අහල පහල හිටපු අයටත් නිදිමත යන්න එක්කම.

“ මොකක්ද බන් දිස්නක..මටත් මේ නින්ද යාගෙන ආවේ...“

කඩුපුල් මල් පිපිලා ගෙදර මිදුලම සුවඳයි...

කඩුපුල් මල් මම ඇත්තටම දැකලා තිබුණේ නැහැ. නමුත් මීට වසර අටකට පමණ පෙර මගේ පියාණන් ගෙනැවිත් නිවස යාබද මහෝගනී ගහක් අසල ගස්ක කොටයක් මත ඉතාමත් සුරැකිව සහ ආදර බරිත සාත්තු සප්පායම් වලින් සැනසී මීට දින කීපයකට කලින් එහි ප්‍රධාන පත්‍රයකින් මල් හට ගන්නට පටන් ගත්තා. එහි මුල්ම මල් දෙක අද දවස පුරා ටිකෙන් ටික විකසිත වන්නට වුනා. ඔබටත් දැකගන්නට මම එහි ඡායාරූප ටිකෙන් ටික පියවරෙන් පියවර ජංගම දුරකතනයට ලබාගත්තා.එතරම්ම පැහැදිලි නැතිවුනත් බලන්න කැමති සහ නොබලපු හැමෝටම මෙය අලුත් දෙයක් වෙයි. මොකද කඩුපුල් කියන්නේ රාත්‍රියේ පිපී රාත්‍රියේම පරවෙන දුරලභ මල් විශේෂයක්.

මේ උදේ 7 ට විතර තත්වය..

මේ උදේ 8.30ට විතර..කෙමෙන් කෙමෙන් පොහොට්ටුව විශාල වෙනවා

වේදනාත්මක සමුගැනීම...හිතවත් OBSERVER නික්මයාම...

සනත් විජේවර්ධන හෙවත් OBSERVER එහෙමත් නැත්නම් ඔබා මාමා. අද උදෑසන ජීවිත කරළියෙන් සමුඅරන්. විශ්වාස කරන්න අමාරු වුනත් පිලිගන්නට සිදුවන ජීවිත කටුක සත්‍යයට නැවත වතාවක් මුහුණ දෙන්න අපට සිදුවෙලා. පසුගියදා පැවති සයිබර් සිහින බක්මහ උලෙල අවස්ථාවෙත් සුපුරුදු කෙලිදෙලෙන් තමන්ගේ දරු මුණුපුරන් වගේ පිරිසක් එක්ක විටෙක කෙලිලොල් තරුණයෙක් හා විටෙක තාත්තා කෙනෙක් වගෙන් හිටපු ඔබා මාමා අද උදේ සියිබර් අවකාශය විතරක් නොවෙයි මුළු ජීවිතයම දාලා ගිහිල්ලා. හොඳ සහ වටිනා මිනිසුන්ගේ ආයුෂ අඩුයි. ඒ වගේම ඔවුන්ගේ නාමය සදා රැඳෙන බව සත්‍යයක්.

  වෙනදා දහසක් දේ එක පෙලට ලියන්න පුළුවන් උනත් අද වචන ගලන්නේ නෑ. කම්පනයත් එක්කම වචන සිරවෙලා. ඔහු මිය යන්න පැය දෙකකට කලින් “අපේ ඉසව්වේ“ මීට පෙර ලිපියට ප්‍රතිචාර දක්වමින් “නිවාඩු නිසා කියවන්න වුනේ නෑ...ඉක්මණට කියවනවා අතහැරුනු ටික“ කියලා ලියලා තිබුණා..එහෙම ප්‍රතිචාර දක්වලා තමයි ඔහු උදෑසන ව්‍යායාම කරන්න යන්නට ඇත්තේ. ඒත් යලිත් කවදාවත් ඔබා මාමට මගහැරුණු ටික කියවන්න ඉඩක් නොලැබේවි. අපිට කලින් ඔහු ජීවිතේ තවත් ගමනක් ගිහින්.

ආදරණීය සනත් විජේවර්ධන හෙවත් ඔබා මාමේ...ඔබට අජරාමර නිවන් සුව!

අදිසි වෙඩික්කරු (The Invisible Shooter) - අවසන් දිගහැරුම

මුලින්ම හැමෝගෙන්ම සමාව ඉල්ලනවා කතාව ටිකක් නෙවෙයි ගොඩක් ප්‍රමාදවීම ගැන. ඒත් අවසන් කොටස කියවනකොට මුල ටික අමතක නම් ඉඩක් තියන වෙලාවක මුල් ටිකත් එක්කම කියවන්න අවස්ථාව ඔබට තියනවා.

පසුගිය කොටස් 1  2  3  4  5  6  7  8

සියල්ල අවසන් වෙමින් පැවතිනි. පොලිස් මූලස්ථානය තුල ජයග්‍රාහී මුහුණවරකින් සියල්ල සිදුවෙමින් තිබිණි. සමස්ත බ්‍රිතාන්‍යයටම අපවාදයක් සහ නින්දාවක් වන්නට තිබූ අපරාධයක සැඟවීයාම වලක්වන්නට ස්කොට්ලන්ඩ්යාඩ් නිලධාරීන්ට හැකිවීම සුවිශේෂී දෙයක්ම විය. මහචාර්ය ඩෙවන්ස් යන බුද්ධිමය සම්පත කුමක් හෝ හේතුවක් මත අහිමිකිරීම හා එයට පසුබිම්වූ හේතු සෙවීමට පොලිස් පරීක්ෂක ගානර් ඇතුලු පිරිස විඳි  අපමණ ගැහැට අග සාර්ථකත්වයේ මල්ඵල නෙලාගන්නට ඔවුන්ට හැකිවී ඇත.

    අපරාධයට සම්බන්ධ ප්‍රධාන පුරුක ලෙස විද්‍යා හා තාක්ෂණ සංගමයේ ආරම්භක සාමාජිකයෙක් වූ මහාචාර්ය කොන්ටෝ අත්අඩංගුවට ගත් අතර ඔහුගෙන් ප්‍රශ්නකිරීම් සිදුකිරීමට රිමාන්ඩ් බන්ධනාගාරයේ රඳවා තැබිණි. එසේම විවිධ මානයන් ඔස්සේ තවත් පුද්ගලයන් කීපදෙනෙක්ම සැකපිට අත්අඩංගුවට ගෙන තිබිණි. අදිසි වෙඩික්කරු ලෙස හඳුනාගත් ඒ සූක්ෂම නිර්මාණය ස්කොට්ලන්ඩ්යාඩ් මූලස්ථානයේ පරීක්ෂණ සඳහා භාවිතාකරන මැදිරියේ මේසය මත තබා තිබිණි.

සුදු තාප්පයක් උඩ වනාපු කබායක් වගේ...

මේ කතාව සත්‍යම සිදුවීමක්.මෙහි සිදුවීම පටු අර්ථයකින් නොදැක සරල විදියට හා ප්‍රායෝගික විදියට බලන්න කියලත් ඉල්ලීමක් කරනවා මුලින්ම..සිද්ධිය මේකයි..ලංකාවේ කොල්ලෙක් විදේශගත වෙලා බොහොම මහන්සියෙන් ඉතා හොඳ මුදලක් එහෙමත් උපයාගත්තලු. ලංකාවෙන් යද්දි වැටට හිටවපු පොල් පිත්ත වගේ හිටපු මේ කළු කොලුවා ලංකාවට එද්දි තඩි කළු යකෙක් වගේ පොරක් වෙලාලු..උදාහරණය ක් මතක් කරනවනම්...හරියටම අපේ...රු..නෑ.. නෑ උදාහරණ ඕන නෑ. කොහොමහරි තඩි කළු පොරක්ලු ලංකාවට ආවේ. ඇවිත් බොහොම ඉක්මණට ගේ එහෙම පිලිවලක් කරලා හොඳ වටින වාහනේකුත් අරගත්තාලු. පස්සේ ඉතින් කොළුවට ඕන වුනේ පෙලවහක් කරගන්නලු. රට යන්න කලින් කොලුවගේ යහපත් චර්යාවේ හොඳකමට රට ගිහින් ලක්ෂ ගාණක් හොයන් ආවත් ගමේ කෙල්ලෝ නෙවෙයි කොල්ල දිහා හැරිලාවත්  බැලුවේ. මොකද ලංකාවේ ඉන්න කාලේ කොල්ලගේ වැඩ ගැන වැඩියෙන්ම දැනගෙන හිටියේ කෙල්ලන්ගේ අම්මලා.

  ලඟ පාතින් හරි ගියපු නැති තැන කොල්ලා වෙන පලාතකින් වැඩට බැහැලා.වාහනේ පෙන්නලා, අව්කණ්ණාඩි එහෙම දාලා ජැන්ඩියට හිටිය තඩි කළු කොල්ලට කොහොමහරි පෙර පිනකට වගේ සුදු කිරිපාට ලස්සන කෙලි පොඩ්ඩක් සෙට් වුණාලු. මේක කොල්ලට ඉවසා දරාගන්න බැරිතරම් ප්‍රීති ජනක දෙයක් වුනාලු. බඳින්නත් කලින්ම කෙල්ලව ගෙදර අයට පෙන්නන් එක්කගෙන ආවලු. ඇවිත් නිකන් හිටියේ නෑ තමන්ව තඹේකට ගණන් ගත්තේ නැති ගමේ කෙල්ලන්ටයි, උන්ගේ අම්මලාටයි පේන්න දවසෙම කලේ ගම පුරා රවුම් ගහපු එක. නිකන් නෙවෙයි කෙල්ලව බදාගෙන නිකන් කැරොල් කරත්තේ යනවා වගේ දෙන්නා ගමේ පාරවල් පුරා කැඩුනු කවලං ඉංග්‍රීසි සිංහල යොදාගෙන කතාකර කර යනවා.

“චිරාන්“ අපි ආයෙත් නැගිටිමු දෙපයින්...උඹට ඉක්මණ් සුවය..

සිංහල බ්ලොග් අවකාශයේ ඔබගේ මෙන්ම මගෙත් සහෘදයෙක් වන හිතවත් චිරාන් මධුරංග සහෝදරයා හෙවත් Chiran's Blog අපේ හිතවතා මේවන විට සැත්කම් හේතුවෙන් රෝහල් ගතවෙලා සිටින මොහොතක්. පසුගිය අලුත් අවුරුදු දිනයේ පුණ්‍යකර්මයක් සිදුකිරීමට ගමේ පන්සලට පියනගමින් ඉන්නාවිට පාදයේ ඇතිවූ සුළු තුවාලයකට විෂබීජයක් ඇතුල්වීම නිසා ඔහුට ශෛල්‍යකර්මයක් සිදුකිරීමට සිදුවූ බවයි දැනගන්නට ලැබී ඇත්තේ. කෙසේ වෙතත් මේ වනවිට චිරාන්ගේ තත්වය යහපත්. ඔහු ඉක්මණ් සුවය ලබමින් සිටිනවා. නමුත් බොහෝවිට මේ හේතුවෙන් ඔහුට සයිබර් සිහින උළෙලට සහභාගීවීමට නොහැකිවනවා ඇති. 

  මේ වෙලාවේ රෝහලේ ඇඳක් මත සුවය ලබමින් ඉන්න ඔබේත් මගේත් හිතවතාට ඉක්මණ් සුවය පැතූ කෙටි පණිවුඩයක් හෝ දුර ඇමතුමක් ලැබෙනවානම් මේ මොහොතේ හැමදේටම වඩා ඔහුගේ හිත ශක්තිමත් වේවි. හිතවත් හැමගෙන් ඒ පුංචි ඉල්ලීම සිදුකරනවා.( චිරාන් මධුරංග - 071-5954135)

චිරාන් ඔබට ඉක්මණ් සුවය ලැබේවා !

2 වසරක සැමරුම - අපේ ඉසව්ව සහ සිතුවිලි පලස

අපේ ඉසව්ව සහ සිතුවිලි පලස බ්ලොග් අඩවි යුගලය අද දෙවැනි උපන් දිනය සමරනවා. මේ මොහොත පුද්ගලිකව ඉතාමත් සතුටුදායක අවස්ථාවක්. 2010 වර්ෂයේ අප්‍රේල් මස 18 වෙනිදා ගාල්ල වටරැක සිට මුලින්ම සයිබර් අවකාශයට මුදාහල අපේ ඉසව්ව සහ සිතුවිලි පලස බ්ලොග් අඩවි දෙක වෙනස් අන්ත දෙකක සිට මගේ සංකල්පනා ලෝකයට දායාද කරන මාධ්‍යයන් දෙකක් බවට පත්වුනේ එතරම්ම ලොකු හැඟීමකින් නොවෙයි. නිවහල් මතය පවසන්නට “අපේ ඉසව්වත්“ කාව්‍ය සංකල්පනා එලිදක්වන්න “සිතුවිලි පලස“ත් නිර්මාණය කරාට එය නියම තත්වයට ගෙන එන්නට මාස කීපයක් ගතවුණා. ඒත් අද ඒ අඩවි දෙක සිටින තත්වය ගැන හදවතින්ම සතුටු වෙන්න පුළුවන්.

   සිංහල බ්ලොග් අවකාශය තුල විවිධ ක්ෂේත්‍රයන් යටතේ විවිධ දේ අකුරු කරන හිතවතුන් අතර අපේ ඉසව්ව හා සිතුවිලි පලසටත් පොඩි හරි ඉඩක් ඒ හදවත් වලින් ලැබුණනම් ඒ තමයි ලැබුණු ලොකුම සම්මානය. ඒ වගේම නිවහල් අදහස් අගය කරන වචනයක් මේ අඩවි දෙක වෙනුවෙන් කිසිවෙක් පැවසුවානම් එය තමයි ලැබුණු හොඳම ඇගයීම. කාර්යබහුල ජීවිතයේ කාලයක් යොදාගෙන මේ බ්ලොග් අඩවි දෙකත් එක්ක ගෙවුණු ජීවිතය හරි සුන්දරයි. හරියට වෙනස් හැකියාවන් ඇති පුංචි දරුවෝ දෙන්නෙක් එක්ක ජීවිතය ගෙවනවා වගෙයි.

මා බාල කාලේ සිංහල අවුරුද්දේ මතක

මේ පාර අවුරුදු කොහොමද කියලා යම් කෙනෙක් ඇහුවම පුරුද්දට අවුරුදු ජයයි කියවුණා මිසක් වෙනදා වගේ ඇඟට සහ හිතට දැනුනු අවුරුද්දක් නොවන බව ඔබටත්  දැනෙන්න ඇති. එයට හේතු සාධක වුනු කාරණා බොහොමයක් අතරේ සමාජය කෙමෙන් කෙමෙන් සංස්කෘතික හා ජාතික වශයෙන් වැදගත්කමක් ඇති උත්සව ඇල්මැරුණු ස්වභාවයෙන් සමරන බව පෙනෙන්න තිබෙනවා. එහෙම හුදෙකලා අවුරුද්දක් ගෙවෙද්දි කාර්යබහුල ජීවිතයක් ගත කරන්න සිදුවෙලා තිබෙන මටත් සිහිවුණේ කුඩා කාලයේ අවුරුදු සමරපු විදියයි.

    දකුණේ මාතර ප්‍රදේශයේ කොහොමත් සිංහල අලුත් අවුරුද්ද බොහොම ඉහලින් සමරනවා. මිනිස්සුන්ට කොතරම් අගහිඟකම් තිබුණත් අවුරුද්ද වෙනුවෙන් කොහොමහරි තමන්ගේ අරමුදල් කළමණාකරණය කරගෙන බොහොම ජයට අවුරුදු සමරනවා. ඉස්සර අලුත් අවුරුදු ලිත ලැබුණ ගමන් අපි පෙරලලා බලන්නේ අවුරුද්ද කවද්ද සහ අවුරුදු චාරිත්‍ර යෙදිලා තියන නැකත් වෙලාවන්. ඒ නැකත් වෙලාවන් බලලා අම්මා කියන වදන් පෙලක් තියනවා...“ ආ...මෙදා සැරේ අවුරුදු කන්න  තියෙන්නේ රෑට...උයන්නනම් හොඳට වෙලාව තියනවා..නැත්නම් ගිය අවුරුද්දේ කිරිබත වඩවා ගන්නවත් වෙලාවක් තිබුණෙ නෑ“ මෙතනින් ඉඟි කරන අවුරුද්දට කලින් ලැබෙන පාසල් නිවාඩුවෙන් පස්සේ තමයි සිංහල අවුරුද්ද කියන එක හොඳටම දැනෙන්නේ. අවුරුද්දට වත්ත පිටිය සුද්ද කරලා ගෙදර සායම් පිරියම් කරලා ගෙවල් හෝදනකොට අපිට පැවරෙන රාජකාරි බොහොම කැමැත්තෙන් කරන්නේ අවුරුද්දේ තමන්ට ලැබෙන වතාවතක් කරනවා වගේ.

“පෙරටුගාමී සමාජවාදී පක්ෂය“ රටේ අවශ්‍යතාවයක්ද?

     අපේ රටට අවශ්‍යය ඇත්ත වශයෙන්ම දේශපාලන පක්ෂයද? නැතිනම් සමාජ ව්‍යාපාරද? පොදුවේ පිලිගැනීම අනුව වර්තමානයේ හතු පිපෙන්නාක්සේ බිහිවෙන පක්ෂ විනා සෘජු හා ජනමූල සමාජ ව්‍යාපාර බිහිවීම විරල සිදුවීමක් වී ඇත. එබැවින්ම සමාජ ව්‍යාපාරයක අවශ්‍යතාව දැඩිව දැනෙන අවධියක සමාජ ව්‍යාපාරයක් වෙනුවට තවත් එක් පක්ෂයක් බිහිවීම එක්තරා සිදුවීමක් පමණක් තත්වයට ඇද වැටීම වැලැක්විය නොහැක්කකි. එසේනම් “පෙරටුගාමී සමාජවාදී පක්ෂය“ යුගයේ අවශ්‍යතාව හඳුනානොගත් විකල්පයක් බව කිව යුතුය. මෙහිදී ශ්‍රී ලංකාව වැනි බහු වාර්ගික,බහු ආගමික හා බහු පාක්ෂික නාමික සමාජවාදී රාජ්‍යයකට වඩාත් උචිත වන්නේ ධනේෂ්වර ක්‍රමය උද්දීපනය කරමින් ක්‍රියාත්මක වන පක්ෂ ක්‍රමයක්ද? නැතහොත් සමාජයීය ප්‍රතිසංශෝධනයකට පාර කියන සමාජ ව්‍යාපාරයක්ද යන සමාජ යථාර්ථය වටහා ගැනීම වඩාත් වැදගත් වේ.