ඉක්මණ් සුවය ලැබේවා “සිත් අහස“ ට...

සිංහල සයිබර් අවකාශයේ සැරිසරන ඔබ බොහෝ දෙනෙක් හොඳින් හඳුනන “සිත් අහස“ බිලොග් අඩවියට අකුරු කරන අප හිතවත් ප්‍රාර්ථනා සෙව්වන්දි සොයුරිය සැත්කමක් හේතුවෙන් රෝහල් ගතවී සිටිනවා. බ්ලොග් අවකාශයේ හැමදෙනාම එක්ක බොහොම මිත්‍රශීලීව ඒ වගේම ෆේස්බුක් සමාජ ජාලයේ මිතුරු මිතුරියන් සමග නිතරව නිර්ව්‍යාජව අදහස් හුවමාරුකරගන්නා ඇය පසුගිය දිනක ගාල්ල රූමස්සලදී පැවති සිංහල බ්ලොග්කරුවන්ගේ හමුවට පවා සහභාගීවුනා. ඒ වනවිටත් මෙම සැත්කම සඳහා දින ලබාදී තිබුණා.

සුළු සැත්කමක් බැවින් එතරම් අවදානමක් නොවන බව ඇය කලින්ම ප්‍රකාශකර තිබුණා. ඇයගේ අතේ ඇතිවී තිබෙන තත්වයක් හේතුවෙන් සුළු ශෛල්‍යකර්මයක් සිදුකිරීමට අද ඇය රෝහලගත වුනා. කෙසේ වෙතත් තවමත් සුපුරුදු ලෙසින්ම විනෝදයෙන් රෝහලට වී කල්ගත කරන බවත් දැනගන්නට ලැබෙනවා. රෝහලේ කාර්යමණ්ඩලය හා රෝගීන්ට සිංහල බ්ලොග් කලාව පිළිබඳ දේශන පවත්වමින් ඇය සැත්කම සඳහා සූදානමින් සිටිනවා. අද රාත්‍රියේ හෝ හෙට උදෑසන ඇයගේ සැත්කම කරන්නට නියමිත බව ඇය ප්‍රකාශකලා.

ඇයව හොඳින් හඳුනන මෙන්ම මොනයම් ආකාරයකින් හෝ ප්‍රාර්ථනා සමග හිතවත්කම් ඇති අප සැම මේ මොහොතේ ඇයට ශක්තියක් වෙමින් මෙම සැත්කමට ධෛර්ය සම්පන්නව මුහුණ දීමට මෙන්ම ඉක්මණ් සුවය ලැබීමට දිරි දීම අපේ යුතුකම බව විශ්වාස කරනවා. එබැවින් මුලින්ම “අපේ ඉසව්ව“ වෙනුවෙන් ඇයට ඉක්මණ් සුවය හා ධෛර්ය ශක්තිය මේ මොහොතේ ප්‍රාර්ථනා  කරනවා.

එසේම ඔබත් එසේ ඇය වෙනුවෙන් කරනවා ඇතැයි විශ්වාස කරනවා. සැත්කමට පෙරාතුව තවමත් ජංගම දුරකතනය අතැතිව රෝහලේ ඇඳ මත සිටින ඇයට ඔබත් සුබ පතනවා ඇතැයි විශ්වාස කරනවා. ඇමතුමකින් කෙටි පණිවුඩයකින් හෝ නිර්ව්‍යාජ පැතුමකින් ඔබගේ පැතුමත් ඇයට එක්කිරීම ඇයට ශක්තියක් වනවා ඇතැයි විශ්වාස කරනවා.