සයිබර් සිහින බක්මහ උළෙලට පසුව???

2014 සයිබර් සිහින බක්මහ උළෙල ඊයේ අවසන් වුණා. බොහොමයක් අලුත් මුහුණු සහ ප්‍රමාණයෙන් අඩු පැරණි මුහුණු එක්වුණු අවස්ථාවක් වුනත් හැමෝටම ඉතාම තෘප්තියෙන් කතා කරන්න පුළුවන් මොහොතක් අවසන් වුණා කියලා කියන්න පුළුවන්. පුද්ගලකිව සහභාගීවුන තුන්වෙනි සයිබර් සිහින බක්මහ උළෙල. වැල්ලවත්ත සහ මහරගම පැවති ඒවාට වඩා සාර්ථකත්වය ලෙස දකින්න පුළුවන් වෙන්නේ සහභාගිත්වය සහ දායකත්වය කියන කාරනා එක්ක. බ්ලොග් අවකාශයේ මිතුරෝ වෙනුවෙන් සංවිධාන ශක්තියට කැපවුණු කණ්ඩායම තමන්ගේ උපරිමය සිදුකරලා තිබුණා කියලා පැකිලීමකින් තොරව කියන්න පුළුවන්. ඒ වගේම අනුග්‍රහය ලබාදුන්න ඔෂනික් ගේම්ස් ආයතනයත් ඉතාමත් මිත්‍රශීලීව මේ කටයුත්තට දායක වීම අගය කල යුතුයි. හුරු පුරුදු මාධ්‍ය සගයා බස් රේඩියෝව තමන්ගේ  සුපුරුදු කාර්යය සිදුකිරීම අමතක කල නොහැක්කක්.

   නිවේදන කටයුතු සිදුකරන අතර තුරේ පුද්ගලිකව මට හැකිවුණා බොහොමයක් අලුත් බ්ලොග්කරුවන් මුණගැහිලා ඔවුන් සමග අදහස් හුවමාරු කරගන්න. මොකද ඔවුන්ගෙන් එකතු කරගත් අදහස් බොහොමයක් මා සතුව තියන නිසා එය ඉතාමත් වැදගත් කියලා මම විශ්වාස කරනවා. සිංහල බ්ලොග් අවකාශයේ අවුරුදු හතරක අත්දැකීම් එක්ක මෙය බොහොම සොඳුරු මතක සටහනක් කියලා සිහිකල යුතුමයි.

   අන්තර්ජාලයේ සිංහල වපසරියේ මගේ ඉතාමත් ලඟ හිත මිතුරන් බොහෝ දෙනෙක් නැවත මුණගැහීම හිතට පුදුමාකාර සතුටක් මතුකල දෙයක්. නම් වශයෙන් සඳහන් නොකලත් වැලඳගෙන ඒ සතුට ප්‍රකාශ කලේ අන්න ඒ වගේ මිතුරන් එක්ක. අතට අතදීලා සුභ පැතූ හැමදෙනාම ඒ මිත්‍රශීලීත්වගේ ගැඹුරුබවට හොඳ උදාහරණයක්. හැමදෙයක් අතරෙම සයිබර් අවකාශයේ සොඳුරු මෙන්ම කටුක අත්දැකීම්ද සිහිවුණු අවස්ථා අනන්තවත් තිබුණා. 

ජායාරූපය - ලිෂාන් පුවක්ඕවිට

හමුවුණු කතාබහකල සහ හැඟීම් බෙදාගත් හැමටම බොහොමත්ම ස්තූතියි. අපි ඉදිරියටත් හොඳ දෙයක් කරමු. එවිට මේ තෘප්තිමත් මිහිර හැමදාම අපි සමගින් රැඳේවි.