දන්න කතාවක නොතේරුණ පැත්ත

එක්තරා නගරයක් හැඩි දැඩි මෙන්ම මදක් සෙල්ලක්කාර තරුණයෙක් විය. මේ තරුණයා සෑම දිනකම පාහේ ආදරය පතා පස්සෙන් යන රූබර මෙන්ම ඉතා ආඩම්බර තරුණියක්ද විය. තරුණයා විවිධවූ ආකාරවලින් තරුණියගේ පසුපස පැමිණෙමින් ප්‍රේමය පතා සිටියද තරුණිය කිසිවිටක සිය සිතැඟි වෙනස් කලේ නැත.තරුණයාට කලහැකි යමක් නොවීය.

    දිනක් තරුණයාට මේ කටයුත්ත එපා විය.තමන් මෙසේ පස්සෙන් ගියත් තමන්ව තඹයකට මායිම් නොකරන තරුණියට හොඳ පාඩමක් ඉගැන්විය යුතුයැයි තරුණයාට සිතුණි. ඔහු කලේ තමන්ගේම හැඩි දැඩි මිතුරෙක් ලවා ඇය උපකාරක පන්ති නිමවී ගෙදර යන මොහොතේ මගරැක සිට හොඳට රිදෙන්නට කම්බුල් පහරවල් කීපයක් දෙන ලෙස යොමු කිරීමයි. මිතුරාද එම කටයුත්තට එකඟවී මගරැක සිට තරුණිය එනවිටම පැන කම්බුල් පහරවල් කීපයක් දුන් අතර තරුණයාද එය දුරක සිට බලා සිටියේය. ටික වේලාවකින් අතිශ්‍යයින්ම බියට සහ කෝපයට මෙන්ම ලැජ්ජාවට පත්ව කම්බුල් පහරවල් කන තරුණිය දෙස  බලා සිටි තරුණයාට එක ගලින් කුරුල්ලන් දෙදෙනෙක්ම දඩයම් කල හැකි අදහසක් මතුවිය. ඔහු සැනෙකින් වීරයාගේ චරිතයට පණ පොවමින් තමන් විසින්ම යෙදවූ තමාගේ මිතුරා සහ තරුණිය අතරට පැන මිතුරාට නොරිදෙන්නට එහෙත් දැඩි පහරවල් ලෙස පෙනෙන සේ පහර කීපයක් එල්ල කලහ.

    මිතුරාද ගුටි කෑවාක් මෙන් ඇද වැටී තරුණායාට බොක්කෙන්ම උදව්වනු පිණිස වැඳවැටී සමාව ගෙන දිව යන්නට විය. දැන් තරුණියට පුදුම ලෙස සතුටුය. ඒ වගේම තරුණයා ගැන ආඩම්බරය.මෙතෙක් කල් තමන් ගණන් ඉස්සුවත් තමන් කරදරයට පත්වූ මොහොතේ තමන් බේරගන්නට ආ තරුණයා ගැන දුකක් මෙන්ම එය පරයා ආදරයක්ද මතුවිය. එහෙත් තමන්ට කරදර කරන්නට ආ මැරයා තරුණයාගේම මිත්‍රයා බව මෙන්ම ඒ තරුණයාගේ සැලසුමක් ලෙස තමන්ට පාඩමක් ඉගැන්වීමට කල දෙයක් බව ඇය නොදන්නීය. සැබවින්ම තරුණයා එහිදී ජයගත්හ.තරුණියට පාඩමක්ද ඉගැන්වූ අතර මිතුරාද ෂේප් එකේ තබාගෙන තරුණියගේ ආදරයද දිනාගත්හ.

    මෙය  පරණ මෙන්ම නිතර අපට අසන්නට දකින්නට ලැබෙන කතාවකි. පසුගිය  සතියේ ලංකාවේ විදුලිබිල දරාගත නොහැකි මට්ටමකට වැඩිකිරීමත් මැයි දිනයේදී හුරතල් විදියට උපක්‍රමශීලීව අඩුකිරීමත් දුටුවිට මා හට සිහිවූයේ ඉහත කතාවම මිස අන්යමක් නොවේ.